Back

تجمل شاہ محویؔ

محمد ضیالحق، اسسٹنٹ پروفیسر اردو
گورنمنٹ کالج چترال

شہزادہ تجمل شاہ محویؔ کھوار شعرو ادبو ہتے اولین شاعرانان موژار اسور کہ ہتیت کھوار زبانو آوانو شعر و ادبو گمبوریان سار مالامال ارینی۔ محویو زمانہ کھوار شعرو ادبو زرین دور جوݰونو بویان۔ ہیہ دورا کھوارو تین بو لوٹ لوٹ شعراء میسر ہونی۔ ہتیتان موژی اتالیق محمد شکور غریب، مظفر خان، مرزا محمد سیر( بابا سیار) شامل اسونی ۔

شہزادہ تجمل شاہ محویؔ 1790ء اتے وختو میتار محترم شاہ ثانی جوو کٹٔورو خاندانہ پیدا ہوئی۔ہتے وختو رواجو مطابقہ عربی و فارسی زبانو علمو تان وختو جو مشہور عالمان ملا کمال و ملا عباس شاہ سار حاصل اریر۔ محوی عربی و فارسیو متبحرعالم بیکو سوم جوستہ جوستہ ای باعمل صوفی دی اوشوئے۔ تصوفو سلسلہ نقشبندیہ شیخ حسام الدین قوقندیو ہوستہ بیعت اوشوئی۔

محترم شاہ ثانی وفات بیکار اچی تجمل شاہ محویو لوٹ برار شاہ افضل ثانیو تے میتاری توریتائے۔ شاہ افضل ثانیو دورہ تجمل شاہ علاقہ دروسو حکمران اوشوئی۔ دروسو حکمرانیو زمانہ تجمل شاہ تان برارو سار ݯھترارو میتاریو اَویریکو بچین جو تروئے دفعہ حملہ دی اریر۔ ای دفعہ پھوک مدو بچین ݯھترارو نغورو سورا قبضہ دی اریر۔ مگم تان درویشانہ طبیعتو وجہین بو ݰاو پݰمان بیتی اچی برارو سوم صلح اریر۔ بالاخر کھوار شعرو ادبو ہیہ صوفی و درویش منش شاعر محلاتی سازیشیان ہوستین 1850ء شہید کرونو ہوئی۔ محویو آخری آرام گاہ بروزو شاہی قبرستانہ شیر۔

تجمل شاہ محویو فارسی زبان و ادبو سورا کامل دسترس اوشوئے ہمو ثبوت ہتوغو کتاب "شرح امالی" شیر۔ہیہ کتاب حضرت سراج الدین ابن عثمان فرغانیو مشہور قصیدہ امالیو فارسی منظوم شرح شیر۔ہیہ کتابو محوی تان زندگیہ دلّیا چھاپ کوریستائی ہیہ کتاب فارسی زبانو ادبہ بو لوٹ مقام لاکھویان۔

تجمل شاہ محویو جوو کتاب "کلیات محویؔ" شیر۔ ہیہ مجموعا فارسی غزلیات سارعلاوہ نظمو اصناف دی موجود شینی۔ محویو فارسی شاعریہ خواجہ حافظ، سعدی شیرازی، مولانا رومی، حکیم ثنائی وا منصور حلاجو ساری متاثرغیچی گویان و ہمی نامور شاعرانان شعران سورا تضمین دی کوری اسور۔

محوی چونکہ راہ تصوفو ای پونغوس دی اشوئے، ہتغین دیتی ہتوغو شاعریہ رنگ تصوف دی نمایان غیچی گویان۔ تصوفو مضامین، دنیو بے ثباتیو ذکر وا فلسفہ وحدت الوجودو مضامین دی ہتوغو شاعریہ غیچی گونیان۔ وحدت الوجودی نظریا محوی منصور حلاجو سار متاثر ساریران، وا تان فارسی اشعارہ منصورو اکثر ذکر و کویان۔
صفیر بلبل گلزار وحدتم محوی
بگوش من لب منصور گفتگو دارد

مولانا رومیو ذکرو ای شعرا کوری ران۔۔۔
زفیض مولوی محوی من این شیرین غزل گفتم
کہ پیوند است با محکم از ہر تار موے من

تجمل شاہ محویؔ کھوار شاعریو اول دورو شاعرانان موژی شمار بویان۔ محمد شکور غریبؔ، مرزا محمد سیر، لعل جبہ، جبین و ملا ہیچ ہتوغو دورو شاعران اوشونی۔

کھوار غزل نیوشیکہ محمد شکور غیربو سار اچی محویو لمبر جوو شیر۔ مگم کھوار زبانہ نظم خصوصاً مخمس نیوشیکا محویو تین اولیت حاصل شیر۔ محوی کھوارو چے فارسیو اموشتے دی شعر رے اسور۔
چہرہ اش رشک نور پنجرش است
گیسوی آن نگار پونگی پھش است

کھوار پونچ بیتیہ زندگیو بے اعتباریو و فانی بیکو زکرو کوری ریران:
دنیائی آسیکو قرار نیکی
پھتوکان سورا اشرو بار نیکی
زندگانیو اعتبار نیکی
ہیچکو عمرو سوم کیہ کار نیکی
ہیچکیہ اشناری پائیدار نیکی

دینو سوم ہردی ݯکئے جوبسکینی زندگیو رنگینیان سوم حال ہویز بیتی مقصد حیاتو روخڅیکو برا ران:
محوی آخرت نکی دودیری ۔۔۔۔ دنیوسوم بیتی اسوس گدیری
کلہ پت بہچوس عاقبت ہیری ۔۔۔ شوغو ژاغا کیہ کوروس ژیری
کارکوروس یا مگر تہ کار نیکی

فارسی غزلو روایتی موضوع یعنی محبوبو جدائیہ عاشقو حالو، وصالو لمحاتان اختصارو، کوچۂ عشقو بدنامی وغیران کھوار غزلہ ہݰ بےساختگیوسورہ پیش کوری اسور کی سوزوگداز و رنگ تغزل ہتیرہ بدرجہ اتم موجود شیر۔
ریتاؤ ہردیہ نکی آرام ۔۔۔ اورارو بیتی شیر غیچہ حرام
عاشقان موژی بر سوای ۔۔۔ ہنیسے مہ چقہ نکی بدنام
وصلو چھوئی غیچ نیشئے ہوریکہ بغائے ۔۔۔ طالعو ویݰکیاری دی کیہ پیغام
پھتوکی عمر غم ژیبیکہ بغائی ۔۔۔ مدعا کیہ اشناری مراد کدام
محویو تہ ساری جدا نو کوروئے ۔۔۔ حضرت ذوالجلال والاکرام

محویو دستیاب فارسی و کھوار کلام بو کم، مگم کلامو ریکو سورہ ہتوغو کلامہ موجود شعری محاسنان اعتراف کوریکہ مجبور بین بویان۔ محویو کلام سلاست، روانی برجستگی و بلند خیالیو ای حسین نمونہ شیر۔ الفاظ و تراکیبان استعمالہ ہتوغوتے استادانہ مہارت حاصل شیر۔ تشبیہات و استعارات استعمال دی برمحل شیر۔

محوی فارسی شاعریو بیشتر اصنافہ طبع ازمائی کوری اسور ہتوغو کلامہ حمد، نعت، منقبت، غزل، مخمس، واسوخت، رباعی، مستزاد، نظم و فرد موجود شینی۔

ہیہ تحریر ݯھترارو گورنمنٹ کالجو میگزینہ چاپ بیتی اوشوئے۔ سال 2019۔

MAHRAKA.COM
A Website on the Culture, History and Languages of Chitral.
Contact: mahraka.mail@gmail.com