khowar story: برمانو Back To Main Page

برمانو

barmanu

اویلو برمانو دوہو مہ یادی نو گوئے، ابلتہ جؤو برمانو دوہؤو وختہ اوا فخمیدہ اوشوتام۔ مگم ہیہ واریہ عام طورہ "برمانو" لفظ استعمال نو باوتائے بلکہ ہوروتے "گوریلہ" راو اوشونی۔ وا دی اوا ہموتے برمانو دوہو کو ریمان؟ وجہ ہیہ کہ روئے لووو موژی اکثر اویلو برمانو دوہؤو حوالو دیاوتانی۔ برمانووو شکل و صورتو بارا کیہ واضح نقشہ تھے نو اوشوئے مگم ای تصور عام اوشوئے کہ ہسے ڥا رینیو غونہ ژاندار وا ہیس چھوئین رویان، خصوصاً عورتانان ورازین گیاک بیرائے۔ (ہے زمانا روئے گریڥپو وختہ بیری پوراوتانی)۔ جؤو دورہ رینیو ذکر کم باوتائے بلکہ ہورو عام انسانی شکلہ زیاد ذکر بوتائے۔۔۔ انسان دی فوجی وردیا۔ ہے زمانہ سن پینسٹھو ژانگار اچو دور اوشوئے۔ فوجیان، خاص کوری گوریلہ فوجو ذکر عام اوشوئے۔ اسپہ ژاغو بعض فوجی جوانان، قست یا چنگیک، گوریلہ بیکو دعویٰ کوراوتانی۔ ہے سوم جستہ ہموݰ افواہ دی نیساوتانی کہ ہندوستانو جاسوس اوچے گوریلہ اسپہ ملکی اساک بیرانی۔ ہمی تمام تصورات اوچے امکانات اموشت بیتی واقعاتان شکل اختیار کوراوتانی۔ وا وخت وختہ خبر نیسیر کہ فلانا دیہا چھویو گوریلہ نسیرو بیرائے۔ ہمی واقعاتان بو شوقو سورہ مجلسین ایغوتے دیاوتانی وا روئے ایمانو حدا پت ہمیتان سورہ یقین کوراوتانی۔

ہموڥ ای واقعہ مہ دیہہ دی ہوئے۔ گریڥپو وخت، روئے بیری پوری اسونی، بلکہ خفتانو ٹیم، زیاد روئے نیشی تان اسونی، ہرونیہ ہوازہ ہوئے۔ ہیرہ ہیارہ روئے بیری نیسانی۔ ہئے ہائیی دیک ہوئے۔ "ہو ہو ہو۔۔۔۔ پھار ہائئے۔۔۔ تھویکو متے انگئے۔۔۔ گولو غیریائے۔۔۔ اے موش پیڅئے ہوتے۔۔" وغیرہ ہوازہ گیکہ پرانی۔ العرض ہتے منظر ہوئے کیاغ کہ پرئیتہ چھویو ڑؤو نیسیکو بیتی اوشوئے۔ مشہور شاعر ناصر الدین طوفان تان شہرہ افاق نظمہ ہورو ہموݰ منظر کشی کویان۔۔۔

ای پھتی اورینی ژانگ، ای پھت کورکونئین دیتی= ظفر تو غیچھو نیرو شوئے ٹھونگیو توکھونئین دیتی

عجیبہ لو ہیہ کہ دیہو ہر گوۻہ ہوازہ گیاو اوشوئے۔ څیق مودہ اچہ روئے خسمت بیتی تان دورانتے بغانی۔ چھوچی بیکو ہار کا تان چیتہ ہے واقعو مرچ مصالحہ دیتی بیان اریر۔ ٹھونگی اوچے اورینی ہیہ حملا بے دریغ استعمال بیرو بیرانی، مگم معلوم نو ہوئے کہ کو س خلافہ۔ دیہو مشہور بایو غیر تان رپالو پٹاخی دیتی ہوستہ کوری گنزولو یو نیسیکو کا ہوئے دیرو کہ "اف ہیرہ شینو موڑین پھار بیران۔۔۔ پیڅھے۔۔" ریکو ہیس پہیو اچی ڷینگئے، تھویکو کھانجو ٹیکی لاکھیرو بیرائے ہرونیہ شینو موڑو ہواز گیرو "اے ژاو، گلزاری خان! کوری بغاو" ہیس بایو غیرو تان نان بیرائے۔

ہیہ واقعہ کندوری مدا پت دیہو مشقولگیو لوٹ موضوع بہچیتائے۔ کیہ خاص لو دی نو اوشوئے۔ گوریلو تان غیچھین پوشیکو دعویٰ دی کوس نو اوشوئے وا دی ہے بارا مختلف نظریات پروشٹہ ہانی۔ بعض روئے ہمو چنگیک دی جوڥاو اوشونی۔ مثلاً ہیہ واقعو بارا تان ہموڥ دی ریتانی کہ شیرین بیگ چھویو مسہ گوم لیکار نیسی گولوغو گوۻو غسل دیاوا کا ہتوغو پوشی گوریلہ رے ژریغ کاردو۔ ہسے زپ انجیکی نو توری اشٹوریرو بیرائے وغیرہ۔ مگم ہڥ سازشی نظریات کیہ بو مقبول نو ہونی۔ اکثریت گوریلو (یا بصورت دیگر برمانوو) وجودو سورہ پکا یقین کوراو اوشوئے۔

ہموݰ واقعات اکثر دیہیں بیرو بیرانی۔ ای دیہا ہنگامہ خیز چھویار اچی ای نان واو نمازدگرا کھارہ شخ څوپاو استائے ہرونیہ "سلام علیکم بیچی" رے کا برونہ یئی نیسیرو۔ واو "ہیت فلانیو اژیلیان۔۔۔ انوسو بیچی راو ڈینڈیری بومیان۔۔ چھوئین اسپہ ورازین کاسیمیان" رے لوٹ بوختو یئی گنیرو۔ ہسے موش وار خطا بیتی تان سورو نامیئرو کہ واؤو توخمیران بیرائے۔

ترویو برمانو دوہوو زمانہ مہ جام یادی گوئے۔ ہے زمانا برمانو انسانی پھوستو نیژی اچی بیریو ژاندارو پھوستہ اوتیتائے۔ اویلو جو دَورہ برمانو کوس جسمانی نقصان کوریک کارہ نو اوشوئے، مگم ہیہ آخیر زمانو ژاندار ظالم نیسائے۔ بو ہڥ روایات کارہ توریتانی کہ برمانو (ہیہ بارا عام طورہ ہموتے ژاندار راوتانی) کوس ژوتی ماریرو یا زخمی کاردو بیرائے۔ دودیریو خبار بو بوہتوناسو بیتی گیاوتائے، مگم ہتے علاقو رویان سار خبار گنیکو ہیس معمولی رو واقعہ معلوم باوتائے۔ ہیہ بارا واقعات زیادہ بوہتوناسو بیکین دیتی روئے چھویو بیری نیسیکو بوہتواوتانی، بلکہ انوسو دی غیژی غاڑین کوساوہ تان سار شانگ کوروتانی۔

بہر حال برمانو دوہوؤ ہیہ دور دی شوخسیتائے۔ برمانؤو سوم ملاقاتو شرف نہ صرف متے ذاتی طورہ حاصل نو ہوئے بلکہ ہڥ کیہ خوش نصیبو دی ژاناک نو ہوتام کہ ہیس برمانؤو تان جو غیچھین پوشی استائے۔ مہ زندگیو محرومیان موژی ہیہ دی شیر کہ اوہ جو برمانو دوہؤوان پوشی دی برمانو نو پوشیتام۔ اوا تان فطری تجسسو ہوستین مجبور اکثر ہیہ سورہ غور کوراوتام کہ برمانو کیاغ؟ ہیس کیہ ادرخو ژاندارا یا گورو غون کیہ اشناری، ہیس بعض وختہ انسانی شکلہ ویریغ کو بویان؟ ہورو اوچے "گوریلو" کیہ تعلق؟ ہندوستانو (یا بصورت دیگر اسپہ تان ملکو) گوریلہ فوجی دیہین ژینان ورازین کوسی کیہ اہم سٹریٹجیک اہدافان حاصل کویان؟ ہیارہ ہیہ لو یاد لکھیکو قابلہ کہ ہے زمانا فرنگیانان برمانو ( Yeti) مڥکھی گیک شروغ نو کوری اسیتانی۔ البتہ ہیت تان برمانؤو شکلہ بیتی کوساوتانی، وا ہیتانتے ہیپی (Hippy) راوتانی۔

بو اچہ ای انوس اوا چکدرو بازارو چوکہ موٹرو انتظارہ روپھی اسیتام۔ پھار لڑیم کہ روئے ای ژاغا غلغلہ بیتی اسونی۔ مہ سوم وخت اوشوئے، بی تماشائیان موژی اوتیتام۔ لڑیم کہ راہہ نیشی دوائی بیزیماک ای حکیم تان تماشو تیاریو کوری اسور۔ ہتو پروشٹہ چٹایئہ ہمی اشناری لکھی اوشونی۔ ای روخات بیرو دودور، ای کمہ بوتلو نامعلوم تیل، ای بٹی زومو اشرو (ہورو تان دعؤو مطابقہ)، ای بیٹریو سورہ کوساک ڥا موکوڑو شکلہ اشٹوکانوکو، وا پھوشٹی نسہ زومان نقشہ۔ زومو پھور ݱونگ باو ایہہ نیسی اوشونی وا ہے سورتو روغو کان دی نویاو اوشونی۔

حکیم صاحب اویل جو پرانو بیٹری یئی نیزی اشٹوکانوکو اچتو دتی ہتوغو آن اریر۔ موکوڑ څروٹھیئکہ پرائے۔ ای دربت څروٹھیئکو بیٹری اف نشیتانی، تھے موکوڑ دی ٹھوخ حالار بی بیتی بومتو پرائے۔ ہرونیہ حکیم صاحبو تان بیٹری آن ہوئے۔
"قدر دان، مہربان ، صاحبان۔۔۔ السلام علیکم! پستے جام معلوم کہ اسپہ ملکہ بو مسئلہ شینی، بلکہ اسپہ ملک مسائلان ماڑ۔ بازارہ کہ بغاو نرخ آسمانتو نیسی شینی۔ آمدنیو دراک نیکی۔ عدالتہ کہ بغاو انصاف نیکی۔ دفترا کہ بغاو پیسار غیر کیہ پرسان نیکی۔ بریاوہ سورہ ۻوکی ایہہ کوراک کا نیکی۔ مگم صاحبانان! ای لو پستے دوم کہ ژان کہ تازہ اوشوئے ہمیت سف اشٹوک۔ اُردو متال شیر کہ جان ہے تو جہان ہے۔ (حکیم تقریر اڑغانی وارہ کوراو اوشوئے)۔۔۔ تھے صاحبانان۔۔۔ انسان تان صحتو تان دُڥمن۔ ورنہ خدائے انسانو بو جام کوری پیدا کوری اسور۔ اسپہ نوجوانان دی تان صحتو تان ہوستین (حکیم صاحب لفظ "ہوستو" سورہ زور پرائے) تباہ کوری ہنیسین بلاہہ ۻھونی اسونی۔ اوہ کہ ہیتان ہے حالتوتے دونیمان تھے لئے کیڑیمان۔" (حکیم صحتو کیہ مسائلان کہ تفصیلو سورہ ذکر اریر ہیتان ذکر ہیارہ مناسب نو)۔ ہیرہ توری حکیم ای دربت پھِک ہوئے۔ اچی ہتے موکوڑ اشٹوکانوکو یئی گانی رویان پاشئے بشار اریر کہ ہیہ کیاغ؟ کا ریتائے کہ "موکوڑ"۔ حکیم صاحب ریتائے کہ "ہیہ موکوڑ نو اے برار گینیان۔۔۔ موکوڑ نو۔۔۔ بلکہ ہیہ ای بو زبردست طاقتور ژاندار۔ پسہ ہموغار کہ ایہہ بغاتامی دیر گوئے، ہتیغار توری راولئیو زوم، وا ہے اچو قشقارو ملک کہ ہوروتے چترال دی رینی۔ قشقارار توری ای شور میل کوسی ای زوم شیر، ہوروتے موڑ کھو رینی" حکیم پھوشٹیہ نقشو ایہہ کوری اسپہ پاشیئتائی کہ ہیہ موڑکھؤ نامین ہتے زوم۔ اوا تان ژانہ ارمان اریتام کہ حکیموکم از کم ہیہ لو کہ صحیح بیسیر کیچہ جام بیسیر، دار گناو شیشی کوہو تے بوغیلیک نو بیسیر۔ بس کُڥمی بی آبادیوتے روغ دار انگیسام۔۔۔ " تھے برارگینیان موڑکھوو ہیہ زومہ ہیہ ژاندار حال بوئے۔ ہموتے قشقارو وارہ برمانو، اردوا بن مانس وا انگریزیا گوریلہ رینی۔ (مگم حقیقت لو ہیہ کہ ہے نقشہ گوریلو نو بلکہ چمپانزیو اوشوئے)۔ ہیہ ژاندار ہرونی طاقتور کہ زومو ہیہ ای پھورار اوشٹوریئے تروئے شور گز دودیری پھار پھورہ دوئے۔ " ۔۔۔ حکیم ہے ژاندارو خور دی فضائلان بلکہ رزائلان بیان اریر۔ افسوس کہ مہ قلم حکیم صاحبو ہے الفاظان کھوارہ بیان کوریکار معذور۔۔۔ "مگم برارگینیان۔۔۔ پسہ ہیہ ژازندارو طاقتو کیہ نوژان مو جوڥور، کوریکو کہ خدائے ہڥ ویز پیدا کوری اسور کہ اسپہ عقل ہتیتانتے نو تارور۔ ہیہ موڑکھوو زومہ ای ہاڥ ویز شیر کہ ہسے ہیہ ژاندارو خوراک وا ہمو ہورو طاقتو راز۔ ہے ویزوتے اسپہ وارہ سلاجیت وا قاشقارو وارہ زومو اشرو رینی۔" حکیم صاحب زومو اشروو انگریزی نامو دی بیان کوری استائے مگم اوا ہتوغو گنیکو نو بیتام۔ "تھے برار گینیان۔۔۔ اوا قومو دردو ژانہ گانی، ژانو پھانہ لکھی، سال یوران کوسی موڑکھوو ہے زومہ توری ہے سلاجیتو گنی انگیتی اسوم۔" ہیغار اچی ہیس زومو اشروو ناقابل یقین وا ناقابل تحریر کمالاتان فصیح و بلیغ زبانہ بیان شروغ اریر۔۔۔ قصہ مختصر ۔۔۔

جنون اکسیر ہے آوارۂ کوئے محبت کو۔۔۔

اقبالو مقامو وا شعرو وزنوتے کیہ پرواہ کہ نو کومیان تھے مصرعو ہموڥ ریکو زیاد بامعنی بوئے۔۔۔

سلاجیت اکسیر ہے ناکارۂ کوئے محبت کو

اوا ہے جوش منٹو اندرینی راہہ روپھی بو زمانو مسائلان حل اریتام۔ مگم ہے مسائلان تعلق زومو اشروو سوم نو بلکہ برمانوو سوم اشوئے۔ بریکہ پت لو کارہ تاریر رے اسونی۔ مہ کیہ گمان کہ مہ ذہنہ شیرو ہانی سوالان جواب چکدرو چوکہ نشیرو حکیمو سوم بوئے رے۔

سرّ خدا کہ سالک عارف بکس نگفت۔۔۔ در حیرتم کہ بادہ فروش از کجا شنید

مہ کہ چیت بیسیر "حکیم الامت" خطابو اقبالو سار گنی ہیہ اڑغانی حکیموتے دیسام۔


( نیویشاک: ممتاز حسین )

MAHRAKA.COM
A Website on the Culture, History and Languages of Chitral.
Contact: mahraka.mail@gmail.com